|
|
|
|
|
محنت، اخلاص اور خدمتِ انسانیت
2026-04-02
دنیا میں کچھ شخصیات ایسی ہوتی ہیں جو اپنے کردار، محنت اور خلوص کے ذریعے نہ صرف اپنی پہچان بناتی ہیں بلکہ اپنے وطن اور کمیونٹی کا نام بھی روشن کرتی ہیں۔ ندیم بٹ انہی شخصیات میں شامل ہیں، جنہوں نے یورپ کی سرزمین پر رہتے ہوئے صحافت کے میدان میں ایک منفرد مقام حاصل کیا اور پاکستانی کمیونٹی کو عالمی سطح پر متعارف کروانے میں اہم کردار ادا کیا۔ یورپین دارالحکومت میں رہتے ہوئے ندیم بٹ نے جس انداز میں پاکستانی کمیونٹی کی نمائندگی کی، وہ قابلِ ستائش ہے۔ انہوں نے نہ صرف یورپ میں بسنے والے پاکستانیوں کے مسائل، کامیابیوں اور سرگرمیوں کو اجاگر کیا بلکہ یورپین یونین جیسے اہم ادارے کو ایشیائی کمیونٹی، خصوصاً پاکستانیوں میں متعارف کروانے کا فریضہ بھی سرانجام دیا۔ ان کی صحافت نے مختلف ثقافتوں کے درمیان ایک مضبوط پل کا کردار ادا کیا ندیم بٹ کے صحافتی سفر کا آغاز ایک ایسے معروف ٹی وی چینل سے ہوا جو یوکے اور یورپ میں گھر گھر دیکھا جاتا تھا۔ یہ چینل اپنی الگ پہچان رکھتا تھا اور ناظرین میں بے حد مقبول تھا۔ ایسے پلیٹ فارم پر کام کرنا خود ایک چیلنج تھا، لیکن ندیم بٹ نے اپنی محنت، لگن اور پیشہ ورانہ مہارت کے ذریعے اس چیلنج کو کامیابی میں بدل دیا۔ انہوں نے دن رات محنت کی، اپنی صلاحیتوں کو نکھارا اور جلد ہی وہ وقت آ گیا جب ناظرین ان کی خبروں اور پروگرامز کا بے چینی سے انتظار کرنے لگے۔ ان کی کامیابی کا راز صرف پیشہ ورانہ مہارت نہیں بلکہ ان کا اعلیٰ اخلاق، نرم گفتاری، محبت، شرافت اور مثبت رویہ بھی ہے۔ انہوں نے ہمیشہ لوگوں کے ساتھ احترام اور خلوص کا برتاؤ کیا، جس کی بدولت انہوں نے یورپ میں نہ صرف ایک کامیاب صحافی بلکہ ایک باوقار انسان کے طور پر بھی اپنی پہچان بنائی۔ کمیونٹی کے افراد ان کے پروگرامز کا آغاز ان کی موجودگی کے بعد کرنا اپنے لیے باعثِ فخر سمجھتے تھے، جو ان کی مقبولیت کا واضح ثبوت ہے ذاتی زندگی میں بھی ندیم بٹ ایک مثالی شخصیت کے طور پر سامنے آتے ہیں۔ انہوں نے اپنی مصروف زندگی کے باوجود اپنے بچوں کی تربیت پر خصوصی توجہ دی۔ انہیں قرآن، اسلام اور دینی تعلیمات سے روشناس کروایا اور ساتھ ہی جدید تعلیم کے زیور سے بھی آراستہ کیا۔ انہوں نے اپنے بچوں کو طب کے شعبے میں آگے بڑھنے کی ترغیب دی تاکہ وہ انسانیت کی خدمت کر سکیں۔ آج ان کے بچے ڈاکٹر بن چکے ہیں اور معاشرے میں خدمتِ انسانیت کے جذبے کے تحت اپنی ذمہ داریاں ادا کر رہے ہیں۔ یہ ان کی بہترین تربیت اور وژن کا عملی مظہر ہے 23 مارچ 2026 کا دن ندیم بٹ کی زندگی میں ایک یادگار سنگ میل ثابت ہوا۔ اس موقع پر پاکستان کے سفارت خانہ برسلز کی جانب سے انہیں بہترین صحافت کے اعزاز سے نوازا گیا۔ یہ ایوارڈ سفیر پاکستان، رحیم حیات قریشی نے انہیں پیش کیا مبارک باد کے مستحق ہیں سفیر پاکستان جنھوں نے صحافتی میدان میں ملک و قوم کی خدمت کرنے والے محب وطن پاکستانی کے کندھے پر ہاتھ رکھا اس سے قبل 2006 میں عزت مآب سفیر پاکستان سعید خالد نے برسلز کے سب سے پہلے اور متحرک صحافی وقار ملک کو شیلڈ اور ایوارڈ سے نوازا تقریب میں جیسے ہی ندیم بٹ نام پکارا گیا، پورا پنڈال تالیوں سے گونج اٹھا اور کمیونٹی نے خوشی کا بھرپور اظہار کیا۔ یہ لمحہ نہ صرف ندیم بٹ کے لیے بلکہ پوری پاکستانی کمیونٹی کے لیے فخر کا باعث تھا یہ اعزاز دراصل ان کی برسوں کی محنت، لگن اور قومی خدمات کا اعتراف تھا۔ انہوں نے اپنی صحافت کے ذریعے نہ صرف معلومات فراہم کیں بلکہ نوجوان نسل میں شعور بیدار کیا۔ انہوں نے برسلز پارلیمنٹ اور یورپین پارلیمنٹ جیسے اداروں کا تعارف عام کیا، جس کے نتیجے میں نوجوانوں اور طلبہ میں سیاسی آگاہی پیدا ہوئی اور وہ مثبت سیاست کی جانب راغب ہوئے۔ آج یورپ میں پاکستانی نوجوانوں کی سیاست میں شمولیت اس بات کا ثبوت ہے کہ ندیم بٹ جیسے افراد کی کاوشیں رنگ لا رہی ہیں کمیونٹی کے افراد کا یہ بھی ماننا ہے کہ ندیم بٹ کی خدمات کو مدنظر رکھتے ہوئے انہیں برسلز پارلیمنٹ اور یورپین پارلیمنٹ کی سطح پر بھی اعزازات سے نوازا جانا چاہیے۔ کیونکہ انہوں نے اپنی صحافت کے ذریعے نہ صرف پاکستانی کمیونٹی کی نمائندگی کی بلکہ یورپی اداروں اور ایشیائی کمیونٹی کے درمیان فاصلے کم کرنے میں بھی اہم کردار ادا کیا۔ ندیم بٹ اپنی کامیابی کو ہمیشہ اللہ تعالیٰ کی رحمت اور کرم قرار دیتے ہیں۔ ان کا کہنا ہے:“خلوصِ دل سے کی گئی محنت اور سچی نیت سے کی گئی عبادت کبھی رائیگاں نہیں جاتی۔ میری ہمیشہ خواہش رہی کہ میں انسانیت کی خدمت کروں اور اپنے بچوں کو اعلیٰ تعلیم دوں۔ اللہ تعالیٰ نے میری دعاؤں کو قبول کیا اور مجھے کامیابی عطا فرمائی۔” ندیم بٹ کہتے ہیں: “جب آپ محنت کو اپنی عظمت بنا لیتے ہیں تو قدرت خود آپ کو کامیابی کی دہلیز تک پہنچا دیتی ہے۔ شرط یہ ہے کہ انسان ثابت قدم رہے اور مثبت سوچ اپنائے رکھے بلاشبہ، ندیم بٹ کی زندگی ایک ایسی روشن مثال ہے جو ہمیں یہ سکھاتی ہے کہ اگر انسان محنت، دیانتداری اور اخلاص کے ساتھ اپنے مقصد کی طرف بڑھتا رہے تو کامیابی اس کا مقدر بن جاتی ہے۔ ان کی داستان نہ صرف صحافت سے وابستہ افراد بلکہ ہر اس شخص کے لیے مشعلِ راہ ہے جو اپنی زندگی میں کچھ بڑا کرنا چاہتا ہے۔ ندیم بٹ واقعی صحافت کے افق پر چمکتا ہوا ایک درخشندہ ستارہ ہیں، جن کی روشنی آنے والی نسلوں کو بھی راستہ دکھاتی رہے گی برسلز سے نوجوان اور معروف بزنس مین اور ترقی پسند لیڈر شیخ ماجد نے اس موقع پر کہا کہ ترقی صرف وہی انسان حاصل کر سکتا ہے جو اپنے دل میں اخلاص رکھتا ہو، اپنی نیت میں سچائی رکھتا ہو اور انسانیت سے بے لوث محبت کرتا ہو۔ دنیا میں بے شمار لوگ محنت کرتے ہیں، مگر اصل کامیابی انہی کے حصے میں آتی ہے جو اپنے کردار کو مضبوط رکھتے ہیں اور دوسروں کے لیے آسانیاں پیدا کرتے ہیں شیخ ماجد نے کہا کہ ندیم بٹ اسی اصول کی جیتی جاگتی مثال ہیں۔ انہوں نے نہ صرف اپنی محنت سے کامیابی حاصل کی بلکہ اپنے اعلیٰ کردار، سچائی اور مخلصانہ رویے سے لوگوں کے دل بھی جیت لیے۔ انہوں نے کبھی شارٹ کٹ کا راستہ اختیار نہیں کیا بلکہ مسلسل جدوجہد، ایمانداری اور لگن کو اپنا شعار بنایا ان کی زندگی ہمیں یہ سبق دیتی ہے کہ کامیابی صرف دولت یا شہرت کا نام نہیں بلکہ اصل کامیابی وہ ہے جس میں انسان دوسروں کے لیے فائدہ مند ثابت ہو۔ ندیم بٹ نے اپنی صحافت کے ذریعے نہ صرف معلومات فراہم کیں بلکہ لوگوں کو جوڑا، شعور دیا اور انسانیت کی خدمت کا درس بھی دیا۔ یہی وجہ ہے کہ آج وہ صرف ایک کامیاب صحافی ہی نہیں بلکہ ایک مثال بن چکے ہیں۔ ایک ایسی مثال جو یہ بتاتی ہے کہ اگر انسان مخلص ہو، سچا ہو اور انسانیت سے محبت کرے تو قدرت خود اس کے لیے کامیابی کے دروازے کھول دیتی ہے۔
مودی کو آسٹریلیا کے دورے پر جان سے مارنے کی دھمکی
2026-07-06
بھارتی وزیراعظم نریندر مودی کو جان سے مارنے کی دھمکی دی گئی ہے۔ غیر ملکی میڈیا کے مطابق مودی کو آسٹریلیا کے دورے کے دوران میلبرن کے مارول اسٹیڈیم میں 9 جولائی 2026کو ہونے والی کمیونٹی تقریب کے دوران جان سے مارنے کی دھمکی دی گئی ہے۔ یہ دھمکی مارول اسٹیڈیم کے فیس بک ایونٹ پیج پر ایک صارف ابو مصطفیٰ کی جانب سے پوسٹ کی گئی ہے۔ اس دھمکی کے بعد آسٹریلیا میں سکیورٹی اداروں کو ہائی الرٹ کر دیا گیا ہے۔ دوسری جانب آسٹریلوی حکام نے دھمکی کو پوری طرح سنجیدگی سے لیتے ہوئے تحقیقات اور حفاظتی اقدامات کا آغازکردیا ہے
بھارت: شوہر نے گرل فرینڈ کے ساتھ
2026-07-06
بھارت میں شوہر نے اپنی گرل فرینڈ کے ساتھ مل کر نئی نویلی دلہن کو جان سے مار دیا۔ بھارتی میڈیا کے مطابق یہ واقعہ ریاست ہریانہ کے ضلع گروگرا کے علاقے مانیسر میں پیش آیا، جہاں 25 سالہ شوہر انکیت نے مبینہ طور پر اپنی بیوی کو گولی مار دی۔ میڈیا رپورٹس میں بتایا گیا کہ یہ واقعہ اس وقت سامنے آیا جب لڑکی کی والدہ نے 22 مئی کو پولیس اسٹیشن میں بیٹی کے شوہر اور سسرال والوں کیخلاف شکایت درج کروائی۔ خاتون نے اپنے بیان میں بتایا کہ بیٹی کی شادی رواں سال فروری میں انکیت سے ہوئی تھی، بیٹی سے رابطہ کرنے کی کوشش کی جس پر کوئی جواب نہیں ملا، پھر سسرال والوں سے رابطہ کیا تو انہوں نے بھی تسلی بخش جواب نہیں دیا۔ پولیس کے مطابق دوران تفتیش معلوم ہوا کہ انکیت نے اپنی گرل فرینڈ رجنی کے ساتھ مل کر بیوی کو گولی مار کر قتل کردیا ہے جس کی لاش گرل فرینڈ کے کرائے کے کمرے سے ملی۔ پولیس نے مزید بتایا کہ انکیت کی شادی کو صرف تین ماہ ہی ہوئے تھے جب کہ وہ رجنی کے ساتھ گزشتہ تین سال سے تعلق میں تھا۔ پولیس کے مطابق انکیت اور رجنی قتل کرنے کے بعد نیپال فرار ہوگئے تھے اور جیسے ہی ملک واپس آئے تو انہیں کرائم برانچ کی ٹیم نے فوری گرفتار کرلیا۔
ڈیلیوری رائیڈر نے جلتے ہوئے فلیٹ
2026-07-05
یک ڈیلیوری رائیڈر نے اپنی زندگی خطرے میں ڈال کر ایک جلتے ہوئے فلیٹ میں بھڑکتے شعلوں کو بجھا دیا۔ یہ واقعہ چین کے صوبے ہوانگزو میں سامنے آیا۔ 21 سالہ این ارپائی ملازمت کے بعد اپنے کرائے کے فلیٹ میں برتن دھو رہے تھے جب انہوں نے فائر الارم کی آواز سنی۔ وہ بھاگ کر باہر نکلے اور تیسری منزل کے ایک خالی فلیٹ میں آگ کے شعلوں کو بھڑکتے ہوئے دیکھا۔ سکیورٹی گارڈز اور اپارٹمنٹ بلڈنگ کے عملے کے افراد متاثرہ فلیٹ کے پاس موجود تھے مگر دھواں راہداری میں بھرتا جا رہا تھا، جس کی وجہ سے آگ تیزی سے پھیل رہی تھی۔ این ارپائی وہاں اپنے پیاروں کے ساتھ موجود تھے اور ان کی جانب سے انہیں فائر فائٹرز کا انتظار کرنے کا کہا گیا، مگر انہوں نے ایک آگ بجھانے والے آلے کو لیا اور جلتے ہوئے فلیٹ کی جانب تیزی سے گئے۔ ماضی میں این ارپائی فائر فائٹنگ کی تربیت لے چکے تھے اور انہوں نے آگ کا پھیلاؤ کے ماخذ کو تلاش کرلیا۔ آگ کے شعلوں کی شدت میں کمی نہیں آئی تو وہ باہر گئے اور زیادہ پریشر والے پانی کے پائپ کو لے کر ایک بار پھر متاثرہ فلیٹ میں آئے اور آگ کو بجھا دیا۔ ان کی دلیرانہ کوشش 10 منٹ تک جاری رہی اور خوش قسمتی سے عمارت میں کوئی فرد زخمی نہیں ہوا۔ مگر پھیپھڑوں میں دھواں بھر جانے کی وجہ سے این ارپائی فائر فائٹرز کی آمد کے بعد بے ہوش ہوکر گرگئے۔ کئی گھنٹوں بعد اسپتال میں ہوش میں آنے کے بعد این ارپائی نے بتایا کہ آگ بجھانے کے دوران وہ ایک بار بھی خوفزدہ نہیں ہوئے۔ این ارپائی جس کورئیر کمپنی میں کام کرتے ہیں، اس کی جانب سے ان کی بہادری پر 2 ہزار یوآن کا نقد انعام دیا گیا جبکہ اسپتال کے بل بھی ادا کیے گئے۔ ماضی این ارپائی بیجنگ میں سکیورٹی گارڈ کے طور پر کام کرچکے ہیں اور وہاں بھی آگ بجھانے کے ایک واقعے میں مدد کرچکے ہیں۔ ہوانگزو آنے کے بعد انہوں نے فائر سیفٹی ٹریننگ بھی حاصل کی۔
وفاقی حکومت نے عیدالاضحیٰ کی
2026-05-20
اسلام آباد: وفاقی حکومت نے عیدالاضحیٰ کی تعطیلات کا اعلان کردیا۔ کابینہ ڈویژن کی جانب سے جاری نوٹیفکیشن کے مطابق عیدالاضحیٰ کی تعطیلات 26، 27 اور 28 مئی تک ہوں گی۔ وزیراعظم کی منظوری سے کابینہ ڈویژن نے عید الاضحیٰ کی چھٹیوں کا نوٹیفکیشن جاری کیا۔
حکومت کا عید سے قبل جدید
2026-05-14
حکومت نے عید سے قبل جدید سہولتوں سے آراستہ عوام ایکسپریس شروع کرنے کا اعلان کر دیا۔ وزیر ریلوے حنیف عباسی نے جدید سہولتوں سے آراستہ عوام ایکسپریس کا عیدالاضحیٰ سے قبل افتتاح کرنے کا اعلان کیا ہے۔ وزیر ریلوے ٹرین کا باقاعدہ افتتاح 24 مئی کو کریں گے، انہوں نے کہا کہ عید سے قبل عوام ایکسپریس کو مکمل اپ گریڈ کر کے مسافروں کے لئے پیش کیا جائے گا۔ وزیر ریلوے کا کہنا تھا کہ یہ ٹرین مسافروں کو تیز، آرام دہ اور معیاری سفری سہولیات فراہم کرے گی اور کم وقت میں پشاور سے کراچی پہنچے گی۔ انہوں نے کہا کہ عوام کو معیاری، محفوظ اور آرام دہ سفری سہولیات مہیا کرنا ہمارا وژن ہے، ان کا کہنا تھا کہ ریلوے نظام کو جدید خطوط پر استوار کرنے کیلئے عملی اقدامات کر رہے ہیں۔
کراچی کے مختلف علاقوں میں
2026-05-14
کراچی کے مختلف علاقوں میں شدید گرمی کے دوران گھنٹوں طویل لوڈشیڈنگ سے شہری اذیت میں مبتلا ہوگئے، مستثنیٰ علاقوں میں بھی بجلی کی غیر اعلانی بندش نے عوام کا جینا مشکل کردیا۔ کہنے کو تو کراچی عروس البلاد ہے، لیکن اس کا شاید ہی کوئی کونا ایسا ہو جہاں بجلی کی آنکھ مچولی جاری نہ ہو۔ یہاں ہزاروں روپے کے بل بھرنے کے باوجود بجلی ہلال عید کی طرح مختصر مدت کے لیے جلوہ دکھاتی ہے۔ حال یہ ہے کہ مستثنیٰ قرار دیے گئے علاقوں میں بھی غیر اعلانیہ لوڈشیڈنگ سے کاروباری سرگرمیاں بھی متاثر ہورہی ہیں ۔ کیماڑی، کھارادر، لیاری، اورنگی ٹاؤن، بلدیہ ٹاؤن ، سعید آباد اور گلشن اقبال سمیت درجنوں علاقے ہیں جہاں کئی کئی گھنٹے بجلی کی بندش معمول بن گئی ہے، جبکہ لیاقت آباد سی ون ایریا، ناظم آباد، گلبہار، رضویہ اور پاک کالونی سمیت کئی علاقوں کے مکین بھی اس کی مسلسل بندش سے گرمی میں کھول رہے ہیں ۔ شہریوں کا کہنا ہے کہ شدید گرمی اور حبس میں طویل لوڈشیڈنگ نے زندگی اجیرن بنا دی ہے۔ بجلی نہ ہوتو پانی کا بحران بونس کے طور پر ملتا ہے۔ دوسری جانب کے الیکٹرک کا مؤقف وہی گھسا پٹا ہے کہ بعض علاقوں میں تکنیکی مسائل اور لائن لاسز کے باعث بجلی کی فراہمی متاثر ہو رہی ہے۔ شہریوں کا کہنا ہے کہ وہ ان تسلیوں سے بہلنے والے نہیں ۔ متعلقہ حکام غیر اعلانیہ لوڈشیڈنگ کا فوری نوٹس لیں اور بجلی کی فراہمی یقینی بنائی جائے۔
ذوالحج 1447 ہجری کا چاند 17 مئی
2026-05-12
اسپارکو کا کہنا ہے کہ ملک میں عیدالاضحیٰ 27 مئی کو ہونے کا امکان ہے۔ ترجمان اسپارکو کے مطابق ذوالحج 1447 ہجری کا چاند 17 مئی 2026 کی شام نظر آنے کے امکانات روشن ہیں۔ ترجمان کا کہنا ہے کہ چاند 17 مئی 2026 کو رات 01:01 بجے پیدا ہونے کی توقع ہے، جبکہ غروبِ آفتاب کے وقت نئے چاند کی عمر تقریباً 18 گھنٹے 30 منٹ ہوگی۔ اسپارکو کے مطابق پاکستان کے ساحلی علاقوں میں غروبِ آفتاب اور غروبِ ماہتاب کے درمیان تقریباً 60 منٹ کا وقفہ متوقع ہے جس کے باعث چاند نظر آنے کے امکانات موافق ہیں۔ فلکیاتی اعداد و شمار کی بنیاد پر یکم ذوالحج 1447 ہجری بروز پیر 18 مئی 2026 کو متوقع ہے جبکہ عیدالاضحیٰ 27 مئی 2026 کو ہونے کا امکان ظاہر کیا گیا ہے۔ ترجمان نے واضح کیا کہ اسلامی مہینے کے آغاز کے حوالے سے حتمی فیصلہ مرکزی رویتِ ہلال کمیٹی کرے گی جو ملک بھر سے موصول ہونے والی معتبر شہادتوں اور مصدقہ مشاہدات کی بنیاد پر اعلان کرنے کی مجاز اتھارٹی ہے۔
وائیڈ فولڈ ایبل فونز کی
2026-05-12
دنیا بھر میں اسمارٹ فون کمپنیاں اب وائیڈ فولڈ ایبل ڈیوائسز کی جانب تیزی سے بڑھ رہی ہیں، جہاں حالیہ Huawei Pura X Max کے بعد نئی ڈیوائسز کی افواہیں زور پکڑ گئی ہیں۔ رپورٹس کے مطابق Samsung اس سال Galaxy Z Fold 8 اور Galaxy Z Flip 8 کے ساتھ ایک وائیڈ فولڈ ایبل متعارف کرا سکتا ہے، جبکہ Apple بھی اپنا پہلا فولڈ ایبل آئی فون، ممکنہ طور پر “آئی فون الٹرا”، ستمبر میں پیش کرنے کی تیاری کر رہا ہے۔ ادھر Vivo کے بارے میں لیکس سامنے آئی ہیں کہ Vivo X Fold 6 میں اسکرین کریز (fold line) کو بہتر بنانے پر خاص توجہ دی جا رہی ہے، جو صارفین کے لیے ایک اہم بہتری سمجھی جا رہی ہے۔ اطلاعات کے مطابق کمپنی مستقبل میں زیادہ چوڑے “بُک اسٹائل” فولڈ ایبل ڈیزائنز کی طرف جا سکتی ہے۔
سوات میں گاڑی گہری کھائی
2026-05-11
سوات میں گاڑی گہری کھائی میں گر گئی، حادثے میں 11 افراد جاں بحق ہوگئے۔ ریسکیو حکام کے مطابق گاڑی ملم جبہ کے علاقے سیر تلیگرام سے گناجیر جارہی تھی کہ گناجیر کے قریب گاڑی گہری کھائی میں جا گری۔ ریسکیو حکام کا کہنا ہے کہ حادثے کے بعد مقامی افراد اور ریسکیو ٹیمیں موقع پر پہنچیں اور 11افراد کی لاشیں نکال لی گئیں جبکہ 5 زخمیوں کو اسپتال منتقل کیا گیا۔ ریسکیو حکام کے مطابق جاں بحق اور زخمیوں میں خواتین اور بچے شامل،جن کو سیدو شریف اسپتال منتقل کر دیا گیا ہے۔
اسلام آباد، راولپنڈی سمیت ملک
2026-05-11
اسلام آباد، راولپنڈی، چکوال اور ایبٹ آباد سمیت ملک کے متعدد علاقوں میں گرج چمک کے ساتھ موسلادھار بارش ہوئی ہے۔ اسلام آباد میں موسم کی خرابی کے باعث کئی پر وازیں متاثر ہوگئیں، لاہور میں آندھی اور بارش سے متعدد علاقوں میں بجلی کی فراہمی معطل ہے۔ ادھر مالاکنڈ،سوات،نوشہرہ ،شمالی وزیرستان سمیت کے پی کے متعدد علاقوں میں بھی بارش ہوئی۔ صوابی میں آسمانی بجلی گرنےکےباعث مختلف حادثات میں 6 افراد زخمی ہوگئے جب کہ کئی علاقوں میں بجلی معطل ہے، وادی نیلم اور مظفرآباد میں بھی بارش ہوئی۔ محکمہ موسمیات کا کہنا ہے کہ آج ملک کے بیشتر علاقوں میں موسم گرم اور خشک جب کہ سندھ اور جنوبی بلوچستان میں شدید گرم رہنے کی توقع ہے۔ اس کے علاوہ بالائی پنجاب،بالائی خیبرپختونخوا، گلگت بلتستان، کشمیر اورخطہ پوٹھوہار میں چند مقامات پر آندھی اور گرج چمک کے ساتھ بارش کا امکان ہے۔
